لاہور میں فائرنگ، خاتون اور دو بچے قتل، ملزم نے خودکشی کرلی

لاہور کے علاقے مزنگ میں فائرنگ کا ایک افسوسناک واقعہ پیش آیا جس میں ایک خاتون اور دو بچوں کو قتل کرنے کے بعد مبینہ ملزم نے خودکشی کرلی۔ پولیس کے مطابق اس واقعے میں مجموعی طور پر چار افراد ہلاک جبکہ دو افراد زخمی ہوئے ہیں۔

پولیس نے بتایا کہ جاں بحق ہونے والوں میں 35 سالہ عائشہ، 14 سالہ مفرہ اور 12 سالہ منیب شامل ہیں۔ جبکہ فائرنگ کے واقعے میں 8 سالہ مناہل اور 18 سالہ سمنہ زخمی ہوئے جنہیں فوری طور پر قریبی اسپتال منتقل کیا گیا جہاں ان کا علاج جاری ہے۔

ابتدائی اطلاعات کے مطابق 45 سالہ شاہد نامی شخص نے پہلے خاتون اور اس کے دو بچوں پر فائرنگ کی جس کے نتیجے میں وہ موقع پر ہی جاں بحق ہوگئے۔ واقعے کے بعد ملزم نے مبینہ طور پر خود کو بھی گولی مار کر خودکشی کرلی۔

یو اے ای میں فیول قیمتوں میں اضافہ، پیٹرول مہنگا کر دیا گیا

پولیس کا کہنا ہے کہ واقعے کی اطلاع ملتے ہی قانون نافذ کرنے والے ادارے موقع پر پہنچ گئے اور علاقے کو گھیرے میں لے لیا گیا۔ جاں بحق افراد کی لاشوں کو پوسٹ مارٹم کے لیے اسپتال منتقل کردیا گیا ہے۔

حکام کے مطابق واقعے کی وجوہات جاننے کے لیے تحقیقات شروع کر دی گئی ہیں۔ پولیس مختلف پہلوؤں سے کیس کی تفتیش کر رہی ہے جبکہ عینی شاہدین کے بیانات بھی قلمبند کیے جا رہے ہیں۔

یہ افسوسناک واقعہ علاقے میں خوف و ہراس کا باعث بنا ہے اور شہریوں نے ایسے واقعات کی روک تھام کے لیے سخت اقدامات کا مطالبہ کیا ہے۔