پاکستانی فضائی حدود کی بندش سے بھارتی ایئرلائنز بحران کا شکار

کراچی: پاکستانی فضائی حدود بند ہونے کے باعث بھارتی ایئرلائنز کی پروازوں کے دورانیے میں اضافہ ہوا ہے، جس سے ٹکٹس کی قیمتیں بھی مہنگی ہو گئی ہیں۔

تفصیلات کے مطابق، پاکستانی فضائی حدود کی بندش نے بھارتی ایئرلائنز کو شدید دھچکا پہنچایا ہے۔ بھارت سے یورپ اور امریکا جانے والی پروازوں کے دورانیے میں اضافے کی وجہ سے زیادہ ایندھن استعمال ہو رہا ہے، جس کے باعث ٹکٹس کی قیمتیں بھی بڑھ گئی ہیں۔

پاکستانی فضائی حدود کی بندش نے بھارتی ایئرلائنز کی آپریشنل پیچیدگیاں بڑھا دیں، خاص طور پر ایندھن کی لاگت میں اضافہ ہوا ہے۔ اس پابندی کے نتیجے میں بھارت سے وسطی ایشیا، مغربی یورپ، مغربی ایشیا، برطانیہ اور امریکا جانے والی پروازیں متاثر ہو رہی ہیں۔

پاکستان سے گزر کر بھارت آنے اور جانے والی دیگر ایئرلائنز بدستور آپریٹ کرتی رہیں گی، اور بھارتی ایئرلائنز کی فضائی حدود پر پابندی سے دیگر ایئرلائنز کو فائدہ ہوگا۔ بھارتی ایئرلائنز کو اب شمالی امریکا، یورپ اور مشرق وسطی کیلئے متبادل راستے اختیار کرنے ہوں گے۔ اس پابندی کے بعد ایئر انڈیا، انڈیگو اور اسپائس جیٹ کی پروازوں کے روٹس میں تبدیلی آئی ہے، جس کے نتیجے میں دورانیے میں اضافہ اور ایندھن کی کھپت بھی بڑھی ہے۔

یاد رہے کہ بالاکوٹ حملے کے بعد فضائی حدود کی بندش سے بھارتی ایئرلائنز کو 700 ارب روپے کا نقصان اٹھانا پڑا تھا، اور بھارت کی قومی ایئرلائن ایئر انڈیا سب سے زیادہ متاثر ہوئی تھی۔