ملتان سلطانز سے علی ترین کی علیحدگی کا اہم اعلان

پاکستان سپر لیگ کی فرنچائز ملتان سلطانز کے مالک علی ترین نے سوشل میڈیا کے ذریعے ٹیم سے علیحدگی کا اعلان کر دیا۔ انہوں نے واضح کیا کہ وہ اصولوں سے سمجھوتا نہیں کرسکتا اور اسی وجہ سے یہ مشکل فیصلہ کرنا پڑا۔ علی ترین کا کہنا تھا کہ ملتان سلطانز کی نمائندگی کرنا ان کی زندگی کا سب سے بڑا اعزاز تھا اور وہ ہمیشہ جنوبی پنجاب کے فینز کے شکرگزار رہیں گے۔

علی ترین نے اپنے پیغام میں بتایا کہ وہ ہر سیزن میں کھلاڑیوں اور اسٹاف کو سمجھاتے رہے کہ جنوبی پنجاب کی نمائندگی صرف ایک ذمہ داری نہیں بلکہ ایک جذبہ ہے۔ یہ وہ خطہ ہے جہاں لوگ محنت سے جیتنے کی کوشش کرتے ہیں اور مشکل حالات میں بھی ہمت نہیں ہارتے۔ انہوں نے کہا کہ یہی جذبہ ٹیم کی کارکردگی کا حصہ رہا ہے۔

اپنے جذبات کا اظہار کرتے ہوئے علی ترین نے کہا کہ مالی نقصان کے باوجود انہوں نے کبھی ٹیم چھوڑنے کا سوچا بھی نہیں، کیونکہ سلطانز ان کے لیے صرف ایک فرنچائز نہیں بلکہ ایک احساس ہے۔ ان کا کہنا تھا کہ وہ ہمیشہ ایمانداری کے ساتھ بات کرتے رہے ہیں اور کبھی دوسروں کے کہنے پر نہیں چلے۔ انہوں نے کہا کہ اگر ٹیم میں رہنے کا مطلب اصولوں سے پیچھے ہٹنا تھا تو وہ ایسا ہرگز نہیں کرسکتے تھے۔

مزید پڑھیں: پی ایس ایل میں تناؤ برقرار: ملتان سلطانز اور پی سی بی کے درمیان اختلافات شدت اختیار کر گئے

انہوں نے مزید کہا کہ وہ ٹیم کو اپنے پیروں پر کھڑا ہوتے دیکھ کر جانا پسند کریں گے، نہ کہ ایسے حالات میں رہیں جہاں انہیں مجبور کیا جائے۔ علی ترین نے فینز سے درخواست کی کہ وہ ملتان سلطانز کو نئے مالک کے ساتھ بھی اسی محبت اور جذبے کے ساتھ سپورٹ کرتے رہیں، کیونکہ یہ ٹیم ہمیشہ جنوبی پنجاب کی عوام کی رہی ہے۔

آخر میں علی ترین نے ایک بار پھر کہا کہ وہ اصولوں سے سمجھوتا نہیں کرسکتا اور اسی لیے ٹیم سے الگ ہونا پڑا۔ انہوں نے وعدہ کیا کہ وہ آئندہ بھی فینز کی طرح اسٹیڈیم میں بیٹھ کر سلطانز کو سپورٹ کریں گے۔ ان کے اس فیصلے نے سوشل میڈیا پر ملا جلا ردعمل پیدا کیا اور فینز نے ان کی خدمات کو خوب سراہا۔