ایم کیو ایم رہنما کی اسمبلی میں معین خان کے انتقال کی جھوٹی خبر پر دعا کی درخواست

سندھ اسمبلی کے اجلاس میں ایک دلچسپ صورتحال اس وقت پیدا ہوئی جب ایم کیو ایم پاکستان کے رہنما صابر قائمخانی نے سابق ٹیسٹ کرکٹر معین خان کے انتقال کی جھوٹی خبر پر ایوان میں ان کی مغفرت کے لیے دعا کی درخواست کر دی۔

صابر قائمخانی کے یہ الفاظ سنتے ہی دیگر اراکین نے انہیں روکا اور اسپیکر نے وضاحت کی کہ سوشل میڈیا پر چلنے والی خبر غلط ہے اور معین خان بالکل خیریت سے ہیں۔

اسپیکر کی تصدیق کے بعد صابر قائمخانی نے ایوان سے معذرت کرلی اور کہا کہ وہ سوشل میڈیا پر پھیلنے والی خبروں کے باعث غلط فہمی کا شکار ہوگئے تھے۔

واضح رہے کہ گزشتہ روز سوشل میڈیا پر 54 سالہ سابق کپتان اور وکٹ کیپر بیٹسمین معین خان کے انتقال کی افواہ پھیلی تھی، جس میں دعویٰ کیا گیا تھا کہ انہیں دل کا دورہ پڑا تھا۔

MQM leader Sabir Qaimkhani mistakenly offered prayers in the Sindh Assembly after falling for fake news about cricketer Moin Khan’s death. He later apologized when members clarified that the news was fake.#SindhAssembly #MoinKhan #FakeNews #TOKReports pic.twitter.com/a0P3XfJALc

— Times of Karachi (@TOKCityOfLights) December 5, 2025

اس افواہ کے تیزی سے وائرل ہونے کے بعد معین خان نے ایک ویڈیو پیغام جاری کیا، جس میں انہوں نے واضح کیا کہ وہ صحت مند ہیں اور ایسی جھوٹی خبریں غیر ذمہ داری کی بدترین مثال ہیں۔

سوشل میڈیا پر افواہ کی اصل وجہ یہ سامنے آئی کہ 65 سالہ سابق کرکٹر معین خان راجپوت کا انتقال ہوا تھا، لیکن صارفین نے غلطی سے ان کی تصویر کے بجائے قومی کرکٹر معین خان کی تصاویر استعمال کر دیں۔

یاد رہے کہ معین خان 1990 سے 2004 تک پاکستان کرکٹ ٹیم کا حصہ رہے اور 1992 ورلڈ کپ جیتنے والی ٹیم کے اہم رکن تھے۔ انہوں نے اپنی کیریئر میں ٹیسٹ اور ون ڈے کرکٹ میں شاندار کارکردگی دکھائی اور 300 سے زائد کیچز ریکارڈ کیے۔