برطانوی وزیر اعظم کیئر اسٹارمر مستعفی ہو سکتے ہیں، ٹرمپ کا دعویٰ

واشنگٹن: امریکی صدر ڈونلڈ ٹرمپ نے دعویٰ کیا ہے کہ برطانیہ کے وزیر اعظم کیئر اسٹارمر جلد اپنے عہدے سے استعفیٰ دے سکتے ہیں۔ یہ بیان ایسے وقت میں سامنے آیا ہے جب برطانیہ میں کیئر اسٹارمر کی قیادت اور سیاسی مستقبل کے حوالے سے قیاس آرائیاں زور پکڑ رہی ہیں۔ کیئر اسٹارمر استعفیٰ کی افواہیں برطانوی سیاسی حلقوں میں موضوعِ بحث بنی ہوئی ہیں۔

ڈونلڈ ٹرمپ نے اپنے سوشل میڈیا پلیٹ فارم "ٹروتھ سوشل” پر ایک بیان میں کہا کہ کیئر اسٹارمر وزارتِ عظمیٰ کے منصب سے الگ ہو جائیں گے۔ انہوں نے دعویٰ کیا کہ اسٹارمر دو اہم شعبوں، امیگریشن اور توانائی، میں مؤثر کارکردگی دکھانے میں ناکام رہے ہیں۔

امریکی صدر نے خاص طور پر شمالی سمندر میں تیل کے ذخائر سے متعلق پالیسیوں پر تنقید کرتے ہوئے کہا کہ برطانوی حکومت توانائی کے مواقع سے فائدہ اٹھانے میں ناکام رہی۔ تاہم ٹرمپ نے اپنے پیغام کے اختتام پر کیئر اسٹارمر کے لیے نیک تمناؤں کا اظہار بھی کیا۔

مزید پڑھیں: جنگ بندی دعوؤں کے باوجود لبنان پر اسرائیلی حملے جاری، 7 افراد شہید

دوسری جانب برطانوی میڈیا رپورٹس میں کہا گیا ہے کہ وزیراعظم کیئر اسٹارمر پر لیبر پارٹی کے بعض اراکین پارلیمنٹ کی جانب سے بڑھتا ہوا دباؤ موجود ہے۔ اطلاعات کے مطابق ان سے مطالبہ کیا جا رہا ہے کہ وہ اپنے سیاسی مستقبل اور ممکنہ قیادت کی تبدیلی کے حوالے سے واضح لائحہ عمل پیش کریں۔

برطانوی ذرائع کا کہنا ہے کہ اینڈی برنہم کی سیاسی پوزیشن مضبوط ہونے کے بعد لیبر پارٹی کے اندر قیادت سے متعلق بحث میں شدت آئی ہے۔ بعض رپورٹس کے مطابق پارٹی کے کئی ارکان ان کی حمایت کر رہے ہیں، جس کے باعث کیئر اسٹارمر استعفیٰ کی افواہیں مزید تقویت حاصل کر رہی ہیں، تاہم ابھی تک وزیر اعظم یا حکومت کی جانب سے استعفے کی کوئی باضابطہ تصدیق سامنے نہیں آئی۔