سیالکوٹ میں 200 روپے چوری کے الزام پر ذہنی معذور شخص پر بدترین تشدد

سیالکوٹ میں انسانیت سوز واقعے نے عوام کو جھنجھوڑ کر رکھ دیا، جہاں مبینہ طور پر 200 روپے چوری کرنے کے الزام میں ایک ذہنی معذور شخص کو بدترین تشدد کا نشانہ بنایا گیا۔

پولیس کے مطابق یہ افسوسناک واقعہ سیالکوٹ میں پیش آیا، جہاں متاثرہ شخص پر 200 روپے چوری کرنے کا الزام عائد کیا گیا۔

الزام کے بعد تین افراد نے مبینہ طور پر ذہنی معذور شخص کو شدید جسمانی تشدد کا نشانہ بنایا، جس سے انسانی ہمدردی اور معاشرتی رویوں پر سنگین سوالات اٹھ گئے ہیں۔

واقعے کی ویڈیو بھی منظرِ عام پر آ چکی ہے، جس نے سوشل میڈیا پر شدید ردعمل پیدا کیا اور عوامی غم و غصے میں اضافہ کر دیا۔

ویڈیو وائرل ہونے کے بعد شہریوں اور انسانی حقوق کے کارکنوں نے ملزمان کے خلاف سخت کارروائی کا مطالبہ کیا اور متاثرہ شخص کو انصاف فراہم کرنے پر زور دیا۔

پولیس نے بتایا کہ واقعے کا مقدمہ درج کر لیا گیا ہے اور تینوں ملزمان کو گرفتار بھی کر لیا گیا ہے۔