وفاقی کابینہ میں شامل نئے ارکان میں قلمدان سونپ دیئے گئے

وفاقی کابینہ میں شامل نئے ارکان میں وزارتیں بانٹ دی گئیں۔ مشیروں اور معاونین کو بھی قلمدان سونپ دیئے گئے۔ مسلم لیگ ن کو کلیدی وزارتیں مل گئیں۔

وزیراعظم شہباز شریف نے نومنتخب وزراء کے قلمدانوں کا اعلان کردیا۔ طارق فضل چوہدری کو پارلیمانی امور، علی پرویز ملک کو پیٹرولیم، اورنگزیب کچھی کو قومی ورثہ اور ثقافت کا قلمدان سونپ دیا گیا۔ خالد مگسی کو سائنس اینڈ ٹیکنالوجی، حنیف عباسی کو ریلوے، معین وٹو کو آبی وسائل، جنید انور کو میری ٹائم افیئرز اور رضا حیات ہراج کو دفاعی پیداوار کا قلمدان دیا گیا ہے۔

مصطفی کمال کو نیشنل ہیلتھ سروسز، شزا فاطمہ کو آئی ٹی اینڈ ٹیلی کام، سردار یوسف کو مذہبی امور اور رانا مبشر کو پبلک یونٹ کا قلمدان سونپا گیا ہے۔

وزرائے مملکت میں ملک رشید احمد خان کو غذائی تحفظ ، عبدالرحمان کانجو کو توانائی کے ساتھ پبلک افئیر یونٹ ، عقیل ملک کو قانون و انصاف، بلال اظہر کیانی کو ریلوے اور کھیل داس کو مذہبی امور کا قلمدان دیا گیا ہے۔

نوٹیفیکشن کے مطابق توقیر شاہ کو وزیراعظم سیکرٹریٹ، محمد علی کو نجکاری اور پرویز خٹک کو داخلہ امور کا مشیر مقرر کیا گیا ہے جبکہ معاونین خصوصی میں ہارون اختر کو صنعت و پیداوار، حذیفہ رحمان کو قومی ثقافتی ورثہ، مبارک زیب قبائلی امور اور طلحہ برقی کو سیاسی امور کی ذمہ داریاں سونپی گئی ہیں۔

وزیر اعظم نے چند وفاقی وزراء کے محکمے دوبارہ تفویض کر دیئے ہیں۔ خواجہ محمد آصف کو وزیر دفاع ، اعظم نذیر تارڑ کو وزارت قانون و انصاف کا چارج دے دیا گیا، مصدق مسعود ملک وزیر ماحولیاتی تبدیلی و کوآرڈینیشن،عطاء اللہ تارڑ کو وزارت اطلاعات و نشریات کی ذمہ داری دے دی گئی۔

ڈاکٹر خالد مقبول صدیقی وزیرتعلیم و پیشہ ورانہ تربیت، قیصر احمد شیخ کو وزارت سرمایہ کاری بورڈ کا قلمدان سونپ دیا گیا۔ عبدالعلیم خان کو وزیر مواصلات ، چوہدری سالک حسین کو وزارت سمندر پار پاکستانی و انسانی وسائل کی ترقی ،رانا تنویر حسین کو وزارت قومی فوڈ سیکیورٹی و تحقیق کا قلمدان مل گیا۔