پنجاب میں فارما ڈی طلبہ کیلئے انٹرن شپ پروگرام کا آغاز

محکمہ صحت و آبادی پنجاب نے ڈائریکٹوریٹ آف ڈرگ کنٹرول کے تحت ایک نئے انٹرن شپ پروگرام کا اعلان کیا ہے، جس کا مقصد فارما ڈی کے طلبہ اور گریجویٹس کو عملی تربیت فراہم کرنا ہے۔

اعلامیے کے مطابق یہ پروگرام صوبہ پنجاب بھر کی سرکاری جامعات کے طلبہ اور فارغ التحصیل افراد کے لیے کھلا ہے۔ اہل امیدواروں میں آخری سال کے طلبہ یا نتائج کے منتظر افراد، گزشتہ دو سال کے دوران فارما ڈی مکمل کرنے والے گریجویٹس، اور ایم فل یا ماسٹرز ڈگری رکھنے والے وہ افراد شامل ہیں جنہیں ڈگری حاصل کیے دو سال سے کم عرصہ ہوا ہو۔

حکام کے مطابق اس پروگرام کا مقصد نوجوان فارماسسٹس کی پیشہ ورانہ مہارتوں کو بہتر بنانا، انہیں عملی تجربہ فراہم کرنا اور انہیں ریگولیٹری، کلینیکل اور فارماسیوٹیکل شعبوں میں کیریئر کے لیے تیار کرنا ہے۔ ڈائریکٹوریٹ آف ڈرگ کنٹرول اس انٹرن شپ کی نگرانی کرے گا اور شرکاء کو ادویات کے ضوابط اور پبلک ہیلتھ سسٹم کے حوالے سے عملی آگاہی فراہم کی جائے گی۔

فارن فنڈنگ کیس میں چیٹ جی پی ٹی کا حوالہ عدالت میں زیر بحث

درخواست دینے کے لیے امیدواروں کو آن لائن پورٹل کے ذریعے رجسٹریشن کرنا ہوگی۔ حکام نے واضح کیا ہے کہ صرف آن لائن درخواستیں ہی قابل قبول ہوں گی اور امیدواروں کو اپنی پروفائل مکمل کرنے کے ساتھ تمام ضروری دستاویزات اپ لوڈ کرنا ہوں گی۔

درخواست جمع کرانے کی آخری تاریخ 12 مئی 2026 مقرر کی گئی ہے اور درخواستیں رات 12 بجے تک جمع کرائی جا سکتی ہیں۔ امیدواروں کو ہدایت کی گئی ہے کہ وہ آخری وقت سے پہلے اپنی درخواست مکمل کریں تاکہ کسی تکنیکی مسئلے سے بچا جا سکے۔

یہ اقدام حکومت کی جانب سے صحت کے شعبے کو مضبوط بنانے اور نوجوانوں کو عملی میدان میں بہتر مواقع فراہم کرنے کی کوششوں کا حصہ ہے۔