حنین شاہ نے شاندار فتح کے بعد محنت اور یقین کو کامیابی کا راز قرار دیا

حیدرآباد کنگز کے فاسٹ بولر حنین شاہ نے اسلام آباد یونائیٹڈ کے خلاف سنسنی خیز فتح کے بعد اپنی ٹیم کی اجتماعی کارکردگی اور ذاتی محنت کو کامیابی کی بڑی وجہ قرار دیا ہے۔

میچ کے بعد پریس کانفرنس میں حنین شاہ نے کہا کہ ہر کھلاڑی ہر میچ میں 100 فیصد دینے کی کوشش کرتا ہے اور انہوں نے بھی یہی کیا۔ ان کے مطابق انہوں نے اپنے پلان پر مکمل عمل کیا اور اللہ پر یقین کے ساتھ محنت کی، جس کا انہیں مثبت نتیجہ ملا۔

انہوں نے بتایا کہ وہ گزشتہ چھ سے سات ماہ سے پی ایس ایل کے لیے سخت محنت کر رہے تھے، خاص طور پر انجری سے واپسی کے بعد یہ وقت ان کے لیے مشکل تھا، لیکن انہوں نے ہمت نہیں ہاری اور مسلسل محنت جاری رکھی۔

حنین شاہ نے اس موقع پر نسیم شاہ کا بھی شکریہ ادا کیا اور کہا کہ انجری کے دوران نسیم شاہ نے ان کی بہت مدد کی۔ ان کے مطابق نسیم شاہ نے انہیں دباؤ اور چیلنجز سے نمٹنے کے طریقے سکھائے، جس کا وہ بھرپور کریڈٹ دیتے ہیں۔

کراچی میں “پاپا گینگ” کا مبینہ سرغنہ رینجرز کے ہاتھوں گرفتار

میچ کے آخری لمحات کے بارے میں بات کرتے ہوئے انہوں نے کہا کہ جب صرف چھ رنز بچانے تھے تو زیادہ گفتگو نہیں ہوئی، ان کا اعتماد اللہ پر تھا اور انہوں نے چھ یارکرز کا پلان بنایا تھا، جس کے مطابق ہی فیلڈنگ سیٹ کی گئی۔

انہوں نے کہا کہ کراؤڈ کا ہونا کھلاڑیوں کے لیے بہت اہم ہوتا ہے کیونکہ اس سے حوصلہ ملتا ہے اور ان کے مطابق انہیں بھی بھرپور سپورٹ ملی۔

حنین شاہ نے کوچنگ اسٹاف کی ہدایت کا ذکر کرتے ہوئے کہا کہ انہیں ہمیشہ یہی کہا جاتا ہے کہ ذہن کو صاف رکھیں اور اپنی بولنگ پر فوکس کریں، جس پر انہوں نے مکمل عمل کیا۔

انہوں نے مزید کہا کہ فائنل کے لیے ٹیم سادہ حکمت عملی اپنائے گی اور ہر کھلاڑی میچ ونر ہے، اس لیے وہ اپنی بہترین کارکردگی دکھانے کی کوشش کریں گے۔