کامیڈین یوجین میرمن کار حادثے میں شدید زخمی

امریکی کامیڈین یوجین میرمن، جو مشہور اینی میٹڈ سیریز "بوبز برگرز” میں جین بیلچر کی آواز کے لیے جانے جاتے ہیں، ایک خوفناک کار حادثے میں شدید زخمی ہو گئے ہیں۔ یہ واقعہ امریکی ریاست نیو ہیمپشائر کے علاقے بیڈفورڈ میں پیش آیا۔

حکام کے مطابق حادثہ منگل کے روز دوپہر سے کچھ دیر پہلے اس وقت پیش آیا جب میرمن کی گاڑی ایف ای ایورٹ ٹرن پائیک پر واقع ٹول پلازہ سے ٹکرا گئی۔ ٹکر کے فوراً بعد گاڑی میں آگ بھڑک اٹھی اور وہ اندر ہی پھنس گئے، جس کے باعث صورتحال انتہائی خطرناک ہو گئی۔

حادثے کے فوراً بعد وہاں موجود افراد نے ہمت اور بہادری کا مظاہرہ کرتے ہوئے انہیں بچانے کی کوشش کی۔ نیو ہیمپشائر کی گورنر اور ان کے سیکیورٹی عملے میں شامل ایک پولیس اہلکار نے فوری کارروائی کرتے ہوئے میرمن کو گاڑی کی کھڑکی کے ذریعے باہر نکال لیا۔ حکام نے اس اقدام کو جرات مندانہ قرار دیتے ہوئے کہا کہ بروقت مدد نہ ملتی تو نقصان زیادہ ہو سکتا تھا۔

کامیڈین لکی ڈیئر انتقال کر گئے

پولیس کے مطابق اس واقعے کے حوالے سے ابھی تک کسی کے خلاف مقدمہ درج نہیں کیا گیا اور حادثے کی وجوہات جاننے کے لیے تحقیقات جاری ہیں۔

یوجین میرمن گزشتہ بیس سال سے زائد عرصے سے کامیڈی اور ٹیلی ویژن کی دنیا سے وابستہ ہیں۔ انہوں نے "بوبز برگرز” کے علاوہ دیگر کئی پروگراموں میں بھی کام کیا ہے اور اپنی منفرد آواز اور مزاحیہ انداز کی وجہ سے خاصی شہرت حاصل کی ہے۔