غزہ میں جنگ بندی کے باوجود اسرائیلی حملے جاری، 11 فلسطینی شہید

غزہ میں حماس کے ساتھ جنگ بندی کے باوجود اسرائیلی حملے مسلسل جاری ہیں، جن میں تازہ کارروائیوں کے دوران کم از کم 11 فلسطینی شہید ہوگئے ہیں۔

غزہ کی سول ڈیفنس اور رائٹرز کے مطابق شمالی غزہ میں ہونے والے حملوں میں 3 اور 14 سال کے دو بچے بھی شہید ہوئے ہیں، جس سے جنگ بندی کی خلاف ورزیوں پر تشویش بڑھ گئی ہے۔

غزہ سٹی میں ایک پولیس گاڑی پر حملے کے نتیجے میں 4 افراد شہید ہوئے جن میں ایک 3 سالہ بچہ بھی شامل تھا۔ وزارت داخلہ کے مطابق اسرائیلی جنگی طیاروں نے شہر کے مرکز میں گاڑی کو نشانہ بنایا۔

اسی طرح بیت لاہیا میں اسرائیلی فورسز کی فائرنگ سے ایک شہری شہید ہوا، جبکہ شام کے وقت شاطی پناہ گزین کیمپ کے قریب ڈرون حملے میں متعدد افراد متاثر ہوئے۔

الشفاء اسپتال کے مطابق شاطی کیمپ میں ہونے والے ڈرون حملے کے بعد 5 لاشیں اسپتال منتقل کی گئیں، جس سے علاقے میں صورتحال مزید سنگین ہوگئی۔

واضح رہے کہ اکتوبر 2025 کی جنگ بندی کے باوجود غزہ میں حملے جاری ہیں اور اب تک تقریباً 760 فلسطینی شہید ہوچکے ہیں۔

غزہ کی وزارت صحت کے مطابق 7 اکتوبر 2023 سے جاری جنگ میں مجموعی طور پر 72 ہزار 336 فلسطینی شہید اور 2 ہزار 111 سے زائد زخمی ہوچکے ہیں۔