پوپ لیو سے متعلق ٹرمپ کے بیان پر عالمی ردعمل، میلونی اور دیگر رہنماؤں کی مذمت

امریکی صدر ڈونلڈ ٹرمپ کے پوپ لیو سے متعلق بیان پر عالمی سطح پر شدید ردعمل سامنے آیا ہے اور کئی رہنماؤں نے اس بیان کی مذمت کی ہے۔

اٹلی کی وزیراعظم جارجیا میلونی نے ٹرمپ کے بیان کو ناقابل قبول قرار دیتے ہوئے کہا کہ پوپ لیو کا امن کی بات کرنا اور جنگ کی مذمت کرنا ایک فطری عمل ہے۔

ایران کے صدر مسعود پزشکیان نے بھی اس بیان کی مذمت کرتے ہوئے کہا کہ مذہبی رہنماؤں کی اس طرح توہین نہیں کی جانی چاہیے۔

ایرانی پارلیمنٹ کے اسپیکر باقر قالیباف نے پوپ لیو کے مؤقف کو سراہتے ہوئے کہا کہ ان کے الفاظ بے گناہوں کے قتل کے خلاف آواز اٹھانے والوں کے لیے روشنی ہیں۔

پوپ لیو نے ٹرمپ کی تنقید پر ردعمل دیتے ہوئے کہا کہ وہ خوفزدہ نہیں ہیں اور اپنے اصولوں پر قائم رہیں گے۔

پوپ لیو نے ٹرمپ تنقید کے باوجود جنگ مخالف مؤقف برقرار رکھا

دوسری جانب امریکا کی سابق وزیر خارجہ ہیلری کلنٹن نے بھی ٹرمپ کے رویے پر تنقید کی اور اسے افسوسناک قرار دیا۔

انہوں نے ایک انٹرویو میں کہا کہ ٹرمپ کی غیر متوازن سوشل میڈیا سرگرمیاں تشویشناک ہیں اور اس پر بات ہونی چاہیے۔

یہ معاملہ عالمی سطح پر سیاسی بیانات، مذہبی احترام اور بین الاقوامی تعلقات کے حوالے سے اہم بحث کو جنم دے رہا ہے۔