امریکا ایران کے اصولوں کو سمجھ چکا، اعتماد حاصل کرنا اب امریکا کی ذمہ داری، محمد باقر قالیباف

محمد باقر قالیباف، ایرانی پارلیمنٹ کے اسپیکر اور امریکا کے ساتھ مذاکراتی ٹیم کے سربراہ، نے کہا ہے کہ امریکا اب ایران کی منطق اور اصولوں کو سمجھ چکا ہے۔

مذاکرات کے اختتام کے بعد سوشل میڈیا پر جاری بیان میں انہوں نے پاکستان کی جانب سے مذاکراتی عمل کو آسان بنانے کی کوششوں پر شکریہ ادا کیا اور کہا کہ ایران نے نیک نیتی کے ساتھ بات چیت میں حصہ لیا۔

قالیباف نے کہا کہ مذاکرات سے پہلے ہی واضح کر دیا گیا تھا کہ ایران سنجیدہ ارادے کے ساتھ آیا ہے، تاہم ماضی کی جنگوں کے تجربات کی وجہ سے مخالف فریق پر مکمل اعتماد ممکن نہیں۔

۳/ ما هر آینه، دیپلماسی اقتدار را روش دیگری در کنار مبارزهٔ نظامی برای احقاق حقوق ملت ایران می‌دانیم و لحظه‌ای از تلاش برای تثبیت دستاوردهای چهل روز دفاع ملی ایرانیان دست نخواهیم کشید.

— محمدباقر قالیباف | MB Ghalibaf (@mb_ghalibaf) April 12, 2026

انہوں نے بتایا کہ ایرانی وفد نے مذاکرات کے دوران مستقبل سے متعلق مثبت اقدامات کیے، لیکن مخالف فریق اس مرحلے پر ایران کا اعتماد حاصل کرنے میں ناکام رہا۔

ان کا کہنا تھا کہ امریکا اب ایران کے اصول اور مؤقف کو سمجھ چکا ہے، اب فیصلہ امریکا کو کرنا ہے کہ آیا وہ ایران کا اعتماد حاصل کر سکتا ہے یا نہیں۔

قالیباف نے کہا کہ ایران اپنی قومی خودمختاری اور حقوق کے تحفظ کے لیے سفارت کاری کو فوجی جدوجہد کے ساتھ ایک اہم ذریعہ سمجھتا ہے۔

انہوں نے ایرانی عوام کا شکریہ ادا کرتے ہوئے کہا کہ 40 روزہ قومی دفاع کی کامیابیوں کو مزید مستحکم کرنے کے لیے کوششیں جاری رہیں گی۔